أخبار الأورمان

الخبر
بادر بالثواب.. وشارك بخرطوشة الخير بحائط الشفاء

خرطوشة الخير بحائط الشفاء في مستشفى شفاء الأورمان.. أيه فكرتها؟ وإزاي تقدر تساهم فيها؟ حابين نشارككم كل المعلومات عنها.

البداية كانت لما شفاء الأورمان حطت فكرة جديدة وفريدة من نوعها بإن تبرعات أهل الخير لمرضى السرطان بالمستشفى يكون ليها رمز تذكاري خالد عليه أسماؤهم.. الرمز ده هو "خرطوشة الخير بحائط الشفاء".. اللى عليها يقدر المتبرع يخلد اسمه أو الاسم الغالي عليه "عيلته أو شركته أو مدرسته أو جامعته".. وده بيرسخ مبدأ التكافل الاجتماعي عشان نكون كلنا إيد واحدة في علاج مرضى السرطان في الصعيد.

الغرض منها التبرع بصدقة جارية لصالح علاج الآلاف من مرضى السرطان في الصعيد.. وتوفير كل الخدمات والأجهزة الطبية.. وتكملة الإنشاءات.. وتكريم المتبرعين بتخليد أسماءهم.. وده بيشجع ناس كتير إنهم يساهموا معانا.. كما قال الله تعالى: بسم الله الرحمن الرحيم "إن تُبْدُوا الصَّدَقَاتِ فَنِعِمَّا هِيَ ۖ وَإِن تُخْفُوهَا وَتُؤْتُوهَا الْفُقَرَاءَ فَهُوَ خَيْرٌ لَّكُمْ ۚ" ويُكَفِّرُ عَنكُم مِّن سَيِّئَاتِكُمْ ۗ وَاللَّهُ بِمَا تَعْمَلُونَ خَبِيرٌ".

طب ليه اتسمت خرطوشة؟ الاسم ده راجع لشكل الخرطوش أو المربع اللى كان بيتكتب عليه اسم الملك المصري في عهد الفراعنة.. وده مناسب لطبيعة شفاء الأورمان اللى اتولدت على أرض طيبة "مدينة الأقصر" أجمل المدن الأثرية والسياحية.

فيه منها 3 فئات.. وبيختلف أحجامهم حسب قيمة التبرع.. الفئة الأولى بـ 25 ألف جنيه.. والتانية بـ 50 ألف جنيه.. والتالتة بـ 100 ألف جنيه.. وبيتم التبرع بـخرطوشة الخير بحائط الشفاء إما بالدفع كاش.. أو بالتقسيط علي 25 شهر.

المستشفى بتخصص خرطوشتين للمتبرع.. الأولى بيتم توصيلها لحد باب بيته.. والتانية بيتم وضعها على حائط الشفاء في المستشفى.. وميعاد تسليمها بيكون بعد 45 يوم من الدفع (نقدًا).. وفي حالة التقسيط بيتم تسليم الخرطوشة للمتبرع بعد 45 يومًا من سداد نصف قيمتها.

يلا بادروا بالثواب.. وخلّوا حائط الشفاء يكبر بأساميكم.. ونعالج أكبر عدد ممكن من مرضى السرطان في الصعيد.